الأربعاء، 11 يونيو 2008

احتباس حراري ولا ده عادي

من كام يوم كدة مصر اتعرضت لموجة حارة جدا ووصلت الحرارة على القاهرة 41 درجة مئوية و الجو كان مشمس جداً ومستقر... لكن فجأة وبدون توقعات ولا مقدمات السما غيمت من كل حتة والجو قلب ترات و هوا و فجأة السما نورت وفجأة سمعنا رعد وفجأة مطرت!!


الأمطار الرعدية كانت متفرقة يعني في مناطق كان فيها مطر بس ومناطق كان فيها برق بس ومناطق تانية الجو عاصف فيها...

المهم: قال الأستاذ مجدي أحمد عباس رئيس هيئة الأرصاد الجوية إنها ظاهرة طارئة واستثنائية في مثل هذا الوقت من العام وتحدث نتيجة لارتفاع درجة حرارة سطح الأرض....

طاب.. هل سبب ارتفاع الحرارة هو تأثير الأحتباس الحراري على مصر.. وهل في المستقبل لو أتكررت هذه الحالة الأستثنائية هتكون العاصفة دي اشد وأخطر ويوصل قوة البرق لدرجة الساعقة؟!! ولا اساساً مش هايبقى في مطر لا من الجنوب ولا من الشمال...

هو الغريب ان درجة الحرارة وصلت 36 درجة على القاهرة في نص الليل بعد ما كانت 33 درجة!


وانا عمري ما شفتها 36 درجة مئوية على النت في القاهرة أبداً.... أخرها 33 درجة مئوية و بيبقا في يوليو.... دة معناة ان السبب الرئيسي هو تأثير الأحتباس الحراري على مصر وهو دة الي ساعد على العاصفة الصغيرة دي .....

عموماً المطر خير.. و ارجع واقول ان كل حاجة بأمر ربنا بعيد عن الأسباب العلمية.

Relevents